Ma quantu sunnu!
Currinu, volanu, furrianu, ti fannu cunfunniri, ma ci arriri.
S' infilanu a tutti i banni, fina no funnamentu, dà, all'ummira!
Cu è tignusu, è furtunatu,
Ma cu avi a capiddera, è un guaiu, picchì poi,
Pi spadduccalli ri capiddi, ci voli un pettini a sittantaquattru renti!
T'à scantari ri chiù fissa, picchì ta fannu 'nzutta,
Ti spianu na cosa e appena ti c'abbicini ca vucca aperta p'arrispunnirici,
Ti marranu a vucca ri pittiddi e pi dda sira, manciasti e ti pò iri a curcari saziu.
Cu avi i pugna chiusi, già carricà u rriorbiri, e rè prontu a sparari,
I picciriddi sunnu i chiù feroci,
Un' à pirdunanu a nuddu, sunnu armati finu all' occhi!
Ma unni i trovanu? Cu cci runa ?
Certu, i nanni!...iddi armanu l'artiglieria.
I robbi cancianu culuri, sunnu puntellati ri tanti stidduzzi,
Ti scotuli, ma nni spuntanu sempri ri tutti i lati, rintra i sacchetti ni trovi na manata,
E poi , a sira, quannu ti spogghi pi curcariti,
I trovi puru unni un' avissiru a esseri!
Ma a cosa chiù mistiriusa è quannu i trovi rintra i scarpi!
Ri runni traseru? Ci fuddaru ca pompa?
E comu s'affezzionaru chi quasetti, sunnu tutti 'mpiccicati !
Pi forza, a caloria ri peri i umitià,
A stu puntu un sà siddu lassalli asciucari o siddu l' à scutulari,
Ma siddu l' à scutulari...u ciavuru!
Anchi na casa sinni prea,
Tuttu 'nterra è un campu ciurutu; i pisti, i strascini,
T' assicutanu , un ti lassanu mai, t'arririnu sempri.
Certu, ora ca ci penzu, all'indomani, è da povira scupa chi ci avi a cummattiri,
E' da povira patruna ri casa chi s'avi a sbriscinari tutta na iurnata
Pi sgaddari tuttu du taiu!
Ma pi oggi, un ci pinzamu all'indomani,
Tiramunnilli, lanciamunnilli, facemu na 'mpruvulazzata,
Picciriddi, sparamu... ma chi pittiddi. |