E' sicuramenti u compitu chiù difficili p'un patri e na matri
Accurdari u picciriddu quannu chianci.
Ci voli tanta pacienzia...e fantasia!
A sapiri fari l'unu ri tuttu:l'attori,u comicu,u ballerinu,
Ma soprattuttu,ha sapiri fari u picciriddu puru tu.
U picciriddu chianci,chianci,chianci a cori ruttu,
E tu l'annachi,u fa ballari,tu metti puru a sciccareddu,
Ma nenti,iddu chianci sempri.
E allura pigghi u scrusci scrusci...nenti! U ciuccettu...nenti!
Chianci chiù forti 'i prima!
E du poviru patri si metti a fari tutti l'armali chi canusci,puru chiddi estinti!
Fa u cani,a atta,a pecura...u sceccu...puru u porcu...
Ma nenti,chianci ca pari chi avi misi i batterii novi!
A stu puntu ti metti a fari tutti li onomatopeismi chiù strampalati,
Scusati a parola rossa,ma ci sta!
E o picciriddu ci metti a fari: "voca voca voca...alialè,alialè...
Bau setti! Bau settiti!...Chi c'è? Chi c'è?...Cu fu? Cu fu?...
A vogghia! A vogghia!"...ma nenti!
Quasi quasi du picciriddu penza "ma picchì fannu i scimuniti?",
Si coci e 'nforza ca solita musica...na camurria!
E allura a matri ci fa "gioia mia...sangu miu...cori miu...
Vita mia"... du picciriddu penza "ma tutti i cosi sunnu ri idda,
Ma iu nenti aiu? Chi sunnu egoisti!"
Ma a bumma scoppia appena senti "sciatu miu"...
"Puru u sciatu miu? Ma allura cà mi vonnu veru mortu?"...
E te ccà,cafudda na scarricata ri vuci ca u sentinu fino o continenti!
Allura di genitori si pigghianu ri currivu e 'nforzanu:
A matri rici "piscialettu ra mamma...cacalettu ra mamà"...,
U patri assicunna "talè chi è mascaratu me figghiu...schifiusu ru papà"...
E du picciriddu sbutta:"ma ca comu sta ghiennu a finiri?
Ora affenninu puru?M'inzurtanu ri facci e facci?",
Va fermalu tu!... e 'nziringa na sirena chi argi spalancati,
Puru i tonsilli un sannu siddu hannu a sgriddari fora ora
A chi c'è campu liberu o a natri para r'anni.
Ora a situazioni si fici veru seria,un zannu chi pisci pigghiari:
"Ma chi avi? Si senti mali e nuatri u nu capemu? c'è pora ca avi na colichetta?"
A mugghieri o maritu "tu u sintisti siddu arruttà?"
E u maritu "no,però u 'ntisi piritiari",
"Ma c'ama fari,chiamamu u dutturi? Forsi ci voli na bedda 'gnizioni?",
Appena 'ntisi a parola "'gnizioni",ma chi fu... miraculu!
S'addumiscì a corpu u mascarateddu!
"Finarmenti,ma veru è?". Ancora aricchi ci friscanu a ddi puvireddi.
Ma ora c'è un probblema,u picciriddu l'avi 'nbrazza u patri e l'avissi a curcari,
Ma cu si rischia a smuvillu? 'Nzama Diu s'arruspigghia,sunnu cunzumati!
"Tal 'è ch' è bella chista!" fa u patri, "ora sugnu privu ri nesciri,è spirugghiari na pocu ri cosi,
Avissi a gghiri puru a gabbinettu!
M'attaccà stu 'nnuccenti!".
Ma a trarimentu,passa chiddu ra frutta e abbannia "Scalaru i patati! Chi bedda sciurera ri piseddi!",
Ma chi fu,na scupittata! Si rettiru signali?...
Du nutricu s'arruspigghià cu l'occhi spatiddati tanti
E attaccà na sinfonia megghiu ru maistru Verdi!
Ma ddi cari genitori stavota si misiru a 'ririri,
Stavota u caperu subitu picchì u" attu chianciulinu" si fici sentiri,
Sbarazzà u stumacheddu e ora c'era sulu ri canciarici u quatratu.
Rintra dda stanza acchianà n'anfata terribili,un fetu ca c'era ri scappari!
Sbummicà na puzzura ri cavuli vugghiuti
Ca quasi quasi ci siccà u latti a da puviredda.
Ma eranu accussì cuntenti ca u picciriddu un' avia nenti
Ca du gran fetu ora ci paria un ciavuru ri rosi e gelsuminu! |